مشكلة الزواج أثناء الغربة مع الزوجة هذه قصة واقعية نشرت عن شاب في العقد الثالث حدثت له مشكلة اثناء الغربة مع الزوجة نضغها اليكم حتى تنصحوه وللعلم لا تجعلوا الغربة تطمع وتستهلك أوقاتكم.
مشكلة الزواج أثناء الغربة
انا مغترب من 8سنين وسنى دلوقت 32سنة اجوزت جواز صالونات ومحصلش صالون حلاقة كمان لانى خطبت واجوزت ف شهر ونص 3مرة اشوف خطبتى كانت مراتى معلش غصب عنى ظروف سفرى وضريبة الغربة هيه ال عملت كده شوفنالك عروسة وانزل اجوز ع طول وعشان الغربة هتسرقك ف ده ال حصل بعد 4سنين من الغربة اجوزت وبعد سنتين جواز فشلت طبعا النصيب بس كان ف اسباب انها مستحملتش بعدى عنها وانزل كل سنة شهر ماكنش يرضى حد عارف كان كل المشاعروالاحاسيس صورة ع الفيس وقلب ع الواتس ومكالمة ع الايمو ف الاول رحبت بالموضوع وقالتلى هقف جنبك كمان وفعلا وقفت جنبى ف اول درجة اعملها بعد جوازى انى اشترى قطعة ارض لانى ده كان حلمى وابنى عليها عمارة وتبقه ليا ولاولادى بس للاسف ماقدرتش تكمل حست انها ماجوزتش ظلمتها معايا وظلمت نفسي وانفصلنا بقالى 3سنين وهيه اجوزت الله يسعدها ويعوضنى.
الغربة مع الشغل ومشروعي في مصر
انا من ساعة الموضوع ده وانا بدأت ابعد عن اى حد بقالى سنتين منزلتش مصر وماليش نفس انزل وقاعد بين اربع حطان من الشغل للنوم ومن النوم للشغل انا الحمد دفعت تمن الارض وباقى انى ابنى عليها دور او اتنين واكمل حلمى وبعد كده ابيع شقق وهكذا بس حياتى مبقاش ليها معنى ومبقتش مشجع زى الاول او بمعنى اصح محدش جنبى فرحان انى بعمل عشانه وعشان ولادى ال لسه ماشفتهمش انا فاضل سنتين ف عقدى وانزل استنه وكمل ال بداته وانزل اعيش حياتى ولا انزل دلوقت بس مش معايا اى فلوس وابيع ال عملته ف سنين غربتى كلها وافرح واعيش حياتى لانى ظالم نفسي وماعشتش احلى احلى ايام عمرى بالله عليكم محتاج النصيحة الغربة كربة وماحدش جنبى ينصحنى ومش عارف اعمل اية.
ربنا يكرمك وتحقق حلمك ويرزقك باللي تقر عينك اصبر عشان تحقق حلمك لو في مقدرتك اتجوز وخدها معاك
ماتتجوز وتاخد مراتك معاك وكمل حلمك وانت هناك وارجع انت ومراتك مش لازم تسيبها هنا ابدا من جديد واختار صح وبلاش جواز سرعه ابدا كل حاجه صح اختار واتعرف ع خطيبتك ونصيحه خد مراتك معاك
ضريبه الغربه للاسف
قضي السنتين دول بالطول والعرض وانزل وشوف حالك.
بس صعب تكون انت في بلد ومراتك في بلد .. صعب جدا
ربنا معاك ويكرمك يارب بلاش اكتئاب وتفائل وشوف عرايس واتجوز تاني وربنا يرزقك بالزوجه الصالحه يارب
ما تغلطش و تتجوز و تسيب مراتك و تتغرب للأسف انت و هي بس اللي بتدفعو تمن الغربه
طبعا ما توقفش حياتك على حد مهما كان
على فكرة في كتير زيك كدا وفعلا المغترب بينزل شهر أو شهرين ف السنة مش بيلحق يشوف أو يعرف أو يحب واحدة عشان يتجوزها الا لو قبل ما أغترب كان مظبط نفسه ومتفق أو خاطب
كان المفروض تسافر معاك غلط كبير ال بينزل يتجوز شهر ويرجع يسيب مراته في مصر للوحده والفتن والشيطان ويبعد عشان الفلوس طيب خدها ورزقها ورزقك على الله سوا هنا أو ف الغربة
هي معذورة ومعاها الف حق وانت مسكين الغربة والمادة سرقت منك احلى سنين عمرك
والحل انك تصبر السنتين ال ف عقدك وتنزل نهائي عشان ما تبقاش عملت زي ال رقصت ع السلم
ولما تنزل ربنا يرزقك ببنت الحلال وتكمل حلمك
كل شئ بأوان
انت انسان محترم عارف ليه لانك ماقولتش ولا كلمة سيئة ع طليقتك بالعكس شايف ان معاها حق وانك ظلمتها ياخي روح ربنا يفتح عليك ابواب الرزق
المهم زوجة صالحة معاك ف غربتك بالدنيا وما فيها
شرعا حرام تبعدوا عن بعض اكتر من 6 شهور
اتجوز وخد مراتك وعيش حياتك وماتفكرش ف بكرة ربك بيرزق
الغربة تربة
انت بس حاسس بإحباط من اللي حصلك ف اول تجربه ليك.. انا من رأيي انت خسرت ف زواجك او فشلت فشل مؤقت وده نصيبك ورزقك .. فاكمل هدفك ف شغلك عشان متبقاش حاسس انك خسرت كل حاجه .. ولما تنوي ترتبط تاني لازم تقعد معاها وتعرفها وتعرفك عشان مايتكررش الغلط اللى حصل ف اول تجربه .. ربنا يصلح لك الحال
انا من رائى تستني السنتين وبعدين تنزل تستقر ولسه قدامك العمر والله فيه ناس عايشه في مصر شباب وبنات وقربوا للاربعين ومش حاسين ان فاتهم حاجه بالعكس استقر الاول وبعدين ارتبط وربنا معاك
انزل ( اختار انت ) شريكة حياتك اللي هتكمل معاك وتكون ( انت قادر تديها وقتك وحبك واحتوائك ). الفلوس مش بتعمل اسرة ولا اولاد بكرا تكبر هتلاقي اللي يقف جنبك ويسندك لما صحتك تروح. الفلوس وسيلة لمعيشة كويسة. انما الاسرة هي الحياة
وانت ماخدتهاش معاك ليه اصلا
عموما نقطه ومن اول ااسطر وابدا من جديد
المشكله بتاعتك فالغربيه وفعلا الغربه صعبه بس ماتخليهاش تسرق منك عمرك عيش حياتك طبيعي العمر ال بيروح مش هيرجعلك تاني ومش هيفيدك بيت وغيط وانت لسه اصلا مش متجوز ولا عندك عيال وسنك كبر
استحمل شويه وكمل عقدك ولما تنزل ح تلاقى 100 بنت تتمناك وتبقى تخطب ،،،كتير شباب قدك لسه ما اتجوزوش ،،،فين اصحابك فين اهلك عشان يشاركوك فرحتك فى الارض والحاجه اللى بتعملها ،،،
كل شىء بأوان وده قدر أن شاء الله ربنا يرزقك الخير الزوجة رزق والشغل رزق وكله بقدر من ربنا ركز وحقق حلمك واكيد هتقابل اللى تعوضك سنين الغربة دى أن شاء الله وافرح بنفسك ولنفسك لحد ما تلاقى اللى يشاركك كل أحلامك وافراحك